اعلان وظائف هيئة قضايا الدولة - اعلان رقم 1 لسنة 2025
عن قبول طلبات التعيين فى وظيفة مندوب مساعد من خريجي وخريجات كليات الحقوق والشريعة والقانون والشرطة دفعة 2024
البوست التوضيحي لإعلان هيئة قضايا الدولة دفعة 2024
ــــــــــــــــــــــــــــــــــــــــــــــــــ
التقدير والشروط:
لازم تكون حاصل على تقدير جيد ماينفعش مقبول و لازم تكون خريج حقوق او شريعة وقانون او شرطة (نظام الاربع سنوات وليس متخصصين) ولازم سنك ميعديش ٣٠عام في تاريخ اخر ميعاد للتسجيل الالكتروني ( علما بأن ميعاد التسجيل الالكتروني لم يحدد بعد وهيتم تحديده من قبل الهيئة عن طريق الموقع الخاص بها لاحقا وانا متابع مع حضراتكم مجرد ماتعلن عنه هبلغ حضراتكم بكل جديد.
ــــــــــــــــــــــــــــــــــــــــــــــــــ
أول خطوة هتعملها للتقديم هي:-
مبدئيا كدا هيئة قضايا الدولة عملت السحب في يوم منفصل عن التسليم بعكس النيابة الاداريه عملت السحب والتسليم مع بعض في يوم واحد في تاريخ واحد.
ـــــــــــــــــــــــــــــــــــــــ
اول خطوة في التقديم:
هتسحب الملف من نادي مستشاري هيئة قضايا الدولة وليس من المقر الرئيسي
اذن هتروح نادي مستشاري هيئة قضايا الدولة في الزمالك ٨ شارع ابو الغدا وذلك خلال الفتره دي فقط ابتداءا من 13 / 12 /2025 حتى 1 / 1 / 2026
&- وهتلبس اي زي كجول مش بدلة ولا حاجه، متاح ان حد من قرايبك ( اب، ام، زوجتك، زوجك، اخواتك) دول يروحو مكانك عادي ويسلمو الاوراق مكانك، لكن اي حد خارج الدرجات دي يفضل انك تعمله توكيل خاص بسحب وتسليم الملف بإسم الهيئة... واحيانا بيوافقو من غير توكيل. دا هيبان من اول يوم سحب ان شاء ﷲ.
طيب هتاخد ايه معاك وانت بتسحب الملف؟
الهيئة محددتش بس من خلال خبرتنا في الاعلانات السابقة هتاخد معاك الاتي:
١-صورة من شهادة التخرج بتاعتك + صورة بطاقتك سارية ومش شرط يكون مكتوب فيها خريج+ صورة ايصال مايفيد سداد رسوم التقديم. طيب رسوم التقديم دي هتدفع ازاي؟ الحقيقة اخر سنة كانت بتدفع عن طريق فوري. لكن السنادي الهيئة وفرت وسائل دفع الكترونيه على الموقع بتاعها ودا اللي هنعرفه مع بعض خلال الساعات القادمه لحد ما الهيئة تعلن عن الوسائل دي بشكل رسمي وتحدد ميعاد التسجيل الالكتروني على الموقع. ان شاء الله هبلغ حضراتكم بالتفاصيل دي اول مايتم الاعلان عنها رسميا.
&- حضرتك هتروح نادي الهيئة في الفترة المحدده وهناك هيسلموك ورقة كدا فيها بياناتك الشخصية + حاجة اسمها رقم سري خاص بيك عشان تسجل بيه دخول على موقع الهيئة في الفترة اللي هيفتحو فيها لسه التسجيل لاحقا.. بتملأ بياناتك الشخصية ثم بيانات اساسية عن الاب والام والاخوة والاخوات البيانات دي زي ( الاسم رباعي والرقم القومي والعنوان وتاريخ الميلاد والمؤهل والمهنه) بعد كدا بتضغط زي حفظ ثم بعدها بيظهر ليك وثيقة التعارف كاملة مثبت فيها البيانات اللي انت كتبتها في الاول + باقي الورق بيكون فاضي انت بتملئة يدوي، بتعمل تنزيل للوثيقة وتطبعها في مكتبة وتملاها كلها لحد الدرجة الرابعة وبعد ما تخلص هتصور عليها ثلاث نسخ وتمضي فالاخر على كل الوثائق بخط ايدك بالقلم امضاء حي على كل الوثائق.. ماتقلقوش هنوضح الامور دي بعدين تفصيلا في اللايفات / ثم بعد كدا هتجهز الاوراق المطلوبة منك وهي:
أصل شهادة التخرج واصل بيان الدرجات يتم استخراجهم من الكلية بتاعتك. وشهادة ميلاد كومبيوتر و فيش جنائي ليك موجهة لهيئة قضايا الدولة وفيش جنائي لوالدك موجهة لهيئة قضايا الدولة ولو الوالد متوفي يتم استبدال الفيش بشهادة وفاة كومبيوتر اوصورة منها ولو كان الوالد مسافر يإما يعملك توكيل خاص وتستخرجلة شهادة تحركات من الجوازات عندك ولما ينزل مصر يعمل فيش وتبقي تسلمه للهيئة يإما يعملك فيش جنائي موجهة لهيئة قضايا الدولة المصرية لنفسة من القنصلية اللي موجودة في مكان السفر بتاعه ويبعتهولك / ثم صورة بطاقة الوالد وتكون البطاقة سارية+ صورة بطاقتك حتي لو طالب عادي المهم تكون سارية ويكون معاك اصل البطاقة بتاعتك للإطلاع / ثم عدد 4 صور شخصية حديثة بالزي الرسمي مقاس ٤*٦ مدون عليها الاسم رباعي بالكومبيوتر خلي بتاع التصوير هو اللي يكتبها وملحوظة بيدون جنب اسمك رقم الطلب ودا بتعرفه لما تسجل الكتروني على الموقع الاول لذلك ماتعملش صور شخصية للهيئة لحد ما نتاكد من المعلومة دي لما الهيئة تنزلنا الطلبات على الموقع. وهبلغكم.
/ لو لسه معندكش او معندكيش بدلة و بتاع التصوير قدر يركبلك بدلة ويكون شكلك منطقي وواضح فيها عادي مافيش مشكلة/ + صور عقود ابتدائي لأي ممتلكات عند الوالد او الوالده سواء كانت عقارات او ممتلكات خاصة زي سيارة او رصيد حساب بنكي بتجيب افادة من البنك بذلك، او لو في اي اراضي زراعية بتجيب ليها صور لعقد ابتدائي للارض او حيازة من الجمعية الزراعية.
ملحوظة/ اي عقد صوري اي ليس مسجل ليس له فائدة. و بند الممتلكات دا اختياري وليس اجباري ولو مش متاح عندك البند دا عادي لا يؤثر اطلاقا نهائيا في ملفك. لا تقلق واطمن. لان الاجراء دا مش مطلوب عشان يعرفو مستوى الحالة الاجتماعية كما يعتقد البعض لا ابدا بل له معايير اخرى عند الهيئة و بتتراجع وقت التحريات لاسباب معينه ماتشغلش بالك بيها. ثم تكملة للطلبات ( قيد عائلي للاب موجهة لهيئة قضايا الدولة).
وركز معايا / لو كان والدك بيشتغل في قطاع حكومي او انت بتشتغل في قطاع حكومي يبقي هتجيب من جهة عملك افادة بذلك موجهة لهيئة قضايا الدولة الكلام دا لو كان العمل حكومي لو خاص خلاص عادي طيب لو والدك على المعاش حكومه؟ هيجيب من المعاشات التابعه لوالدك .. افادة بذلك..
بعد كدا هتاخد كل المستندات دي في حافظة بلاستيك وتلتزم بميعاد التسليم الذي ستعلن عنه الهيئة لاحقا عبر موقعها الرسمي ويلاحظ ان في ميعاد سحب الملف كل الجامعات بتسحب فأي يوم من الايام المحدده وهي ١٣/ ١٢ حتى ١/ ١ لكن في تسليم الملف الهيئة بتعلن عن ميعاد كل جامعة بمعني انك هتلاقي كذا جامعة ليهم ميعاد معين.. وعلفكره في النيابة الادارية هي محدده فترة معينه للسحب والتسليم معا بس الفترا دي هتتقسم على الجامعات طيب هتعرف ميعاد جامعتك ازاي ؟ هيبقي من خلال الموقع وهبلغ حضراتكم بالتفاصيل دي ان شاء الله لما الهيئتين يعلنوا باقي التفاصيل/ وبالنسبة لبند الممتلكات في النيابة الاداريه هي مش بتطلبة لحد اخر اعلان ولكن زي ماعرفتكم هو بند مش اجباري طالما مش متوفر عندك.
ــــــــــــــــــــــــــ
بعد تسليم الملف بتاعك الهيئة بتعلن عن مواعيد المقابلات الشخصية عبر الموقع بتاعها وبتعرف ميعادك عن طريق الدخول على الموقع وبتبحث بالرقم القومي بتاعك وهيظهر ميعاد مقابلتك / لازم زي رسمي في المقابلة لكن في يوم السحب او التسليم في هيئة قضايا الدوله بتلبس كاجول عادي / والمقابلات بتتحدد بعد شهر من تسليم الملف يعني غالبا لو التسليم هيتحدد وهينتهي مثلا في شهر ٢ يبقي المقابلات هتتحدد مثلا في شهر 4 وخلي بالك ان النيابة الاداريه وهيئة قضايا الدولة دول اسرع هيئتين بيخلصو مقابلات بمعني ايه؟ بمعني لما يحددو المقابلات بتاعتهم في وقت معين هتكون كل الجامعات مخلصه خلال شهر او شهر ونص بالكتير شامل التخلفات كمان.ـ
